رضيت بالحزن عمر وبالمواجع خليل

وقدرت أعيش بحياةٍ باهتٍ لونها

عوّدت نفسي مدامي جيت عابر سبيل

كل ما دهتني مصيبه قلت يا هونها

عاصرت من دورة الأيام شي مهيل

ومريت بدروب غيري ما يمرونها

من كثر ما شلت ما باقي بجوفي مشيل

روحي تدور معين ولا لقت عونها

كم شجرةٍ جيت أدور لي تحتها مقيل

وحتت ورقها وعرّت فوقي غصونها

واليا رميت الهموم بسهم صبراً جميل

أما يجي خلفها وإلا يجي دونها

اسمع بصدري صياح وهمهمات وعويل

وأردها خايفٍ لا الناس يوحونها

من غربة الروح ضيعت الهدى والدليل

وخطاي تاهت ولابه من يقدونها

نهاري أعتم وليلي بالتعاسة طويل

الكون مشرق وروحي مظلمٍ كونها

هذي علومي بعد فقد الظلال الظليل

مالي من الدور خاويها ومسكونها

زهدت في عيشتي بعد أم طرف كحيل

ياليتي ادري بتالي الوقت وشلونها

عهدي بها يوم تروي قلبي السلسبيل

من قيظ الأيام توردني على عيونها

وتفيض في قلبي الظميان شوق وتسيل

وأروى ولا أروى وأعود أظمأ لماعونها

وان سولفت كني أسمع للحمايم هديل

وأقوم أغني لها والاحي لحونها

كان اختصار الأنوثة في جسدها النحيل

يلغي جميع النسا بعيون مفتونها

كنا سوا والزمن بالوصل مده جزيل

ذقنا حلاوة الحياه اللي يقولونها

ومن ذاق قلبه حنان منقضات الجديل

والله لتشتاله الدنيا على متونها

وأنا بعد ما أهتنيت أقفت وحل الرحيل

ويا ويل حالي ليا قاموا يطرونها

بابقى عليل يحركه النسيم العليل

لاهب في قاع روحه جنت جنونها

وما دام راحت ما بي من حلمي إلا القليل

أن عشت في قلبها وان مت فعيونها

مرزوق الروقي

صفحة الجزيرة الرئيسية

رأي الجزيرة