مرحباً ترحيبة فيها الشمال ارسل هبوبه

بالزعيم القايد اللي زارنا يا مرحبا به

مرحباً باللي جميع الشعب قاموا وهتفوا به

ياهلا في رمزنا الغالي عسى يسلم جنابه

مرحباً يامرحباً حييت ياصقر العروبه

مرحبا واعداد ما تنشى من القبله سحابه

مرحبا نقولها مليون مع مليون نوبه

بالمليك اللي بعرعر نوخت تالي اركابه

ياهلا بالقايد اللي كل الإسلام احتموا به

رافع سيف الشريعة تابع نهج الصحابة

سنة المختار قصده والتفافه مع شعوبه

وكلمة الحق الصريحة نستمعها من خطابه

مرحبا باللي رعى شعبه وفزوا والتقوا به

الحكيم اللي جعل للدار من جوده مهابه

عز شعبه أخو الأنور واعتزوا به وافرحوا به

وكل خير للمواطن سيدي قام ومشابه

يا ولد صقر الجزيره وبالقا تشهد حروبه

طوع العايل وكلن في بطولاته درى به

أسس الدولة وركز بالوطن شرع مشوا به

حكمه القرآن والسنة حكم به وابتدا به

قادها عبدالعزيز وسل سيفه في عجوبه

وحد الدولة وبان الحق يوم أعلن جوابه

وخلف اشبال أسود من أسود ومحسوبه

مثل أبو متعب زعيم الدار عدوانه تهابه

يوم عبدالله وصلنا كل شعبه رحبوا به

أسرة ما فيهم اللي للمواطن صك بابه

من نصاهم ما يجد لازارهم أية صعوبه

وان قصدهم شاف توجيب المودة والرحابه

والسند سلطان يا سعد الذي هم انتخوا به

الحليم اللي رقا للمجد من طلعة شبابه

من شمال وشرق وايضا من بعد غرب وجنوبه

يا ولي العهد تشهد لك على الساحه هضابه

دام أبو خالد يقود الجيش ما نلقى صعوبه

وكان بالعالم نقيب الجيش ما بعده نقابه

سيدي سلطان قدوه للعروبه واحتذوا به

الحكيم اللي يحل المعضله لو به صعابه

وبالأمن نايف على المجرم يسجله عقوبه

ومن تعبث بالوطن نايف يجودله عقابه

من يخون الدار خاين في مماشيه ودروبه

ينكشف بأمر الولي غدر التجمع والعصابه

نشجب الإرهاب واللي ايدوا به واعلنوا به

زمرة الشيطان والبسهم على غره ثيابه

ونترك العابث على داره يحسب في ذنوبه

ويتفاجأ بالرجال اللي تقل غارة ذيابه

الرجال اللي فدوا بأرواحهم أرض نشوبه

ترخص الأعمار دون الدار لا صارت اطلابه

يرعبون المعتدي مهما تعدد في سلوبه

والقوافل سايره ماهمها نبح الكلابه

وعقب ذلك انتهض حر الشمال ورحبوا به

الأمير اللي كما نبع النهر محلى شرابه

قام أبو خالد يرحب بالملك صقر العروبه

ابن مساعد ذخرنا رمز الكرامه والنجابه

ياسمي القايد الحر الشجاع لياشهروا به

له كفوفٍ تلطم العايل بها حتى يهابه

جعل عبدالله لنا يسلم ليا صارت نشوبه

الأمير العادل اللي فيه حزم وبه صلابه

امتواضع للجميع وفيه لطف وبه عذوبه

الأمير اللي ليا منه نطق بلسم جوابه

احتضن قرن الشمال وحدها يلتف صوبه

محتميها من براثيم العدى واحكم نصابه

وعرعر اليوم الفرح فيها جمعنا واسعدوا به

يوم قايد مملكتنا زار عرعر والتقى به

ياهلا والف هلا واقولها مليون نوبه

بالمليك الوالد الراعي هلا يامر حبابه

ياهلا في خادم البيتين يا فخر العروبه

عد من زار الحرم واعداد كل مسلم سعى به

مرحبا واعداد ما هب الشمال وكيفوا به

وعد ما هل المطر لا سال بالقاع انصبابه

كريم بن عايد الذايدي /عرعر

صفحة الجزيرة الرئيسية

رأي الجزيرة