يقولون الرجال الرجل من لا يقبل المهزاع

ولا يخطي ولا يرضى الخطا في كل الأوضاعي

وأنا أقول الحقايق فالتجارب والرجال انواع

ليا جربت بالتجريب تعرف كل النواعي

وخلق الله خلقها ما توافق باكثر الاطباع

من الحكمة جعلها تختلف في بعض الاطباعي

يجي فالناس رجل صافي وافي طويل ذراع

تحيزم به اليا ضاقت عليك وساع الارواعي

وفيهم راعي النخوه ليا اوحى المنتخي فزّاع

ليا منك زهمته فالنوايب جاك فزّاعي

وفيهم واحد قلبه حصاه وقاسي قطاع

ولو تفنى الخليقة ما تغيّر كبر الاصباعي

وفيهم واحد يخدعك زوله بارق لمّاع

وهو سلعة خسارة ما لها شاري وبياعي

وفيهم راعي الحيله سواة الثعلب الخداع

يروغ اليا بغيته عادته ماكر وخدّاعي

وفيهم هيلماني كذوب منافقي قرقاع

على لوخ المجالس والنمايم يقرع اقراعي

وفيهم واحد يصقع بصوته كنه المذياع

اخذها بالسوالف لين ذكره فالملا شاعي

وهو وقت الشدايد بارد راسه ردي الناع

تروح علومه ان جات العلوم انصاف وارباعي

وفيهم واحدٍ راعي شكاوي للعرب جزاع

ولو حاول يخفي غيب سره للملا ذاعي

وفيهم واحد يمشي تحت راي العرب مطواع

قضى عمره حياته كلها روحه ومرجاعي

وانا ما جيت ابروي كل ظامي واشبع اللي جاع

انا ماني مكلف بالعرب ظميا وجيّاعي

وانا ما اوفيت لو كلت العرب بالمدّ ولاّ الصاع

لكن المعذره لن كان جا فالقول مهزاعي

وصلى الله على الهادي محمد للبشر شفاع

ولا غيره لخلق الله بيوم الحشر شفاعي

عوض القوانه

صفحة الجزيرة الرئيسية

رأي الجزيرة