ألا يا الله ياللي لك لحالك تسعة وتسعين

أساميك العظيمة ما خذاها إنسٍ ولا جنّه

لك اسمٍ يا إلهي كون آدم والبشر من طين

ولك اسمٍ نرتجي خيره ولك اسمٍ نلتجي منه

ألا يا الله ثبتنا ليا جينا نرد الدين

بقوله لا إله أنت راعي الفضل والمنه

بعد ذكرك وتوحيدك وتعظيمك عساك تعين

على بدع القصيد اللي يشرف وقفتي فنه

ما دام الشعر في الحكام وحماة البلاد يزين

هل الأشوار عز الدار بالقرآن والسنه

أبنقش في الصفا شعرٍ يخلي القاسيات تلين

معزتهم لها شعرٍ عيون العمي يقرنه

هل التوحيد سباع البيد ضرب وفيد بالحدين

ظلال وريف لاجاء الضيف يشكي الحيف ويونه

تبيع الروح قبل يروح دم المجروح والمسكين

هم الحكام عيال إمام سيوف إسلام منسنه

ملكنا شرعه المصحف ملكنا خادم البيتين

ملكنا سيفنا لاصار في علم العدو لنه

ملكنا صامل الوقفة ملكنا مزبن الجالين

ملكنا ريفنا لاهب من جور الدهر كنه

صليب الراس قاسي باس لا من جات جيم وسين

غريب الوصف وين ألقى له وصوف يحالنه

زعيم العرب عبدالله مكمل سيرة الذربين

معرب والعروق اللي غذاها الطيب جابنه

من اللي يمسح الدمعة من اللي يكسي العارين

من اللي يرتكي للشايب المضيوم ويحنه

من اللي يرفع حجاجه ليا قام الزمان يشين

من اللي غير أبو متعب سلوم الطيب طاعنه

وولي العهد ابو خالد عسى عمره يطول سنين

شربنا حبه وعيّن عروق القلب يرونه

ألا يا سيدي سلطان الا يا مرحبا وأهلين

عدد ما لاح برق وعدة عيونٍ يخيلنه

تراحيب لها بين الضلوع الحانية تلحين

يقول القلب هذا اللي قلوب الناس يغلنه

أبو خالد مقر الجود من مثله طويل يمين

فعوله يمسحن فعول حاتم ويتعدنه

جمع ما بين خير وشر والثنتين في الكفين

وألا ياكم من قرمٍ يدورهن ولاجنه

على أهل الخير تعطي الخير يمني طيب الجدين

وعلى أهل الشر يسراً من يحب الشر لاقنه

يقولون العرب ذكر الحيا والطيبين يبين

شبيه الغيث هماله يدين الناس يرجنه

كريمٍ يطعم الفقراء ويسمع شكوة الشاكين

كريمٍ يضحك عيونٍ غزير الدمع هلنه

كريمٍ يكفل يتيمٍ من الدنيا هله فانين

عطايا كفه اليمنى يا كم من معسر أغننه

بسط كفه على شفه ونادي اللي طواه البين

فتح بيبان بيتٍ لا لقن الضيف نادنه

وزير الجيش أبو خالد ليا جونا العدا عادين

شجاعٍ لابقى الخايف ذليلٍ يرتعد سنه

عطيبٍ ضرب مخلابه يحط الجمجمة قسمين

تولم للمنايا لين خلاهن يهابنه

يروم الموت لأجل عيون عذرا تلطم الخدين

لا قالت دمي أليا سال وين سيوفكم عنه

يموت الشعر عذره ما لقى لك في الوصوف أثنين

ألا يا أمير وصفك في سما الأوصاف وش كنه

أبوك معزي اللي ما غفت عينه مع الغافين

صغير السن مشغلته هجوسٍ ما يخلنه

بعيد الدار لا يمسى ولا يسلا مع السالين

على سيف البحر ضرب العصا غدا لها حنه

بعد ما شب نقَّى له من سباع الوغي ستين

سباعٍ قادها الضرغام للهيجا وخاونه

تقدمهم تحت ليلٍ ظلامه يخلف السارين

على هجنٍ لا طبن تختخ السرحان يطونه

لأجل دارٍ شرت عمره هجدها والعدا ممسين

لقاها من فراقه تستهل الدمع وتكنه

تعزوت به وجاوبها بمصقولٍ وعقل ودين

جريٍ يخلف الهقوه وهو ما يختلف ظنه

يجي دون الحقوق حلوق ومن دون الحلوق يدين

أهل حقٍ ظماهم ما يسده بارد الشنه

ياكود الدم ورقاب المناكب والبرى ذلحين

قوي الدين والإسلام اسامي الله يحمنه

يطش الروس في ليلٍ سواده مثل كحل العين

حريب لا ظما سيفه كبود عداه يسقنه

عسام الخيل والبارود فيه الساعة بليلين

لحق صم الرمك يومٍ فلا الإرحام يرمنه

هجاد للعدا خلى جنايزهم تحت نابين

تعشتها الذيابه عقب ليلٍ ما تعشنه

وأذان الفجر نادى الحق بآيات أقرأ وياسين

ترتل في منابرها على علمٍ يزفنه

يقول الحكم الله ثم حكم مطوع الطاغين

حكم عبدالعزيز مولف قلوبٍ لها زنه

رحمك الله يا عبدالعزيز آمين ثم آمين

تفوز بمغفرة ربك ويسكن روحك الجنه

حكم بعده شغاميمٍ على حكم الوطن مرهين

وطنا ما أكثر عيونٍ على حكمه يحسدنه

وطنا ما يفوح إلا بمسك وعنبر وياسمين

بلاد طيبها عن باقي الأوطان له خنه

يقوم بملة الإسلام شرعاً ما معه شرعين

حقوق الناس مصيونه على يدينٍ يصوننه

حقوق الناس ما تنضام لا حاضر ولابعدين

عقول الغرب لا غلت من الإسلام يوذنه

يدسون الدسايس في وطناً بين حين وحين

وحنا نقمع الفتان وجموعٍ يوالنه

وحنا جيش لإعلان الشهادة والنصر والدين

يطيح الحي فوق الأرض والأكفان يدعنّه

خالد بن مدعث الدوسري

صفحة الجزيرة الرئيسية

رأي الجزيرة