في رثاء والدي الغالي جمعنا الله به في مستقر رحمته إنه سميع مجيب..
|
يالله يالمعبود جل جلالك |
ياواحد ترجى ولا خاب راجيك |
يامالك الملك ومليك الممالك |
تعطي وتاخذ والعطا منك واليك |
يارب وكفوف الدعا سقتها لك |
يارب وادعيك بصفاتك واساميك |
اطلبك عفوك والتجي بك واسالك |
في كل وقت وكل لحظة واناجيك |
قلبي من طعون المواجع لجالك |
ودموع عيني تستغيثك وتدعيك |
فقدت وجه الخير يالله وانا لك |
امشي على امرك واتجنب نواهيك |
ابوي وان جت للزعل والرضا لك |
يزعل ولا يرضى بشي مايرضيك |
في طاعتك خلا الدروب ومشا لك |
ماله على هاذي ولا له على ذيك |
يا طول بال الوقت والدرب حالك |
وانا اتلثم بالصبر والرجا فيك |
يابوي ودعتك بوجه الوفا لك |
يالله عساي برحمة الرب الاقيك |
يابوي ودعتك بصوت الغلا لك |
والحزن يكتبني وانا احاول ارثيك |
لابو الشعر يابوي لو مابكالك |
لابو الورق لو ما غرق في معانيك |
ما غير افكر يوم انا اكبر عيالك |
وابكيك ياليت البكا يفيد وابكيك |
ياتاج راسي والله اني بحالك |
ماغير اهل الدمع لا مر طاريك |
والله ما فارق خيالي خيالك |
من غبت عني والليالي لياليك |
سيرتك في عز السوالف لحالك |
من كبر قدرك بين ربعك واهاليك |
ليت العمر يفدا واسوق الفدالك |
واختار لك ساعات الافراح واهديك |
واعطيك لو ما اقدر ارد العطا لك |
عسى الولي يجزاك عنا ويعطيك |
يابوي ابدعي لك وازيد الدعالك |
وارفع دعاي لرب الارباب واليك |
واقول ياربي يظله ظلالك |
وتضيفه برحمتك في يوم ياتيك |
وتلهمه اجابات النجاة لسؤالك |
يا رب ياللي ما يخيب الرجا فيك |
خالد الجبر |
