يا اللي زعلك يخلي العقل مذهول |
خل العتاب شوي بينك أو بينه |
معقول أصدق بس ما هوب معقول |
وين الغرام اللي لنا خابرينه؟ |
من حول حبك داخل القلب من حول |
تراك في قلبه وروحه وعينه |
مقبول كل اللي يجي منك مقبول |
غلاك منزاله غلا والدينه |
لا تحسبنه عنك سالي ومشغول |
ومن جرب الفرقا عسا الله يعينه |
عايش وكني يا هوى البال معزول |
عن باقي العالم وروحي حزينه |
لا نيب لا صاحي ولا نيب مهبول |
مثل الذي تصفق شماله يمينه |
يا حول يا هجر المحبين يا حول |
بعد ترى خلك تبيح كنينه |
يا اللي بفمك يطلع الهرج معسول |
وين الحنان اللي خبرناه وينه؟ |
لا تستمع في هرج نقالة القول |
أهل القلوب المبغضات اللعينه |
والله مقبل بينا أي مرسول |
لا تطول الفرقا تراها غبينه |
شافي بن عبدالهادي بن راجس |
|
