هيه الا ياراكبين اكوار وراد المقادم نظة |
من حرار هتيم نظة ما خلطهن بالجمل خلاّطي |
من تريّض قدر ما يفرغ كتابي قوّم الله حظه |
اردعوا روس النجايب قدر ما يقدر قلم خطاطي |
تم خلوا للركايب مع طواريق الخرايم جظه |
لا تلثون النجايب لين غربيب الدجا ينخاطي |
وان لفيتوا دار ياخطار ناعمة الثياب الغضه |
ما شكت حامي سموم القيط والعقرب وبرد شباطي |
خبروه ان البلاد اللي عمر في خاطري منقضة |
ما وطى سوق البلاد اللي عمرها عقب خبره واطي |
ما وطاها زول مير انه على طوال المدى فرضه |
عقب ما هي زينه البنيان لا تقدر ولا تنهاطي |
كيف احلب الدر من ديد النعامه وانفخه واخضه |
يوم كلفته وجاد وزان شربه لطه اللطاطي |
منتويه بنية لا شك انا ما اقدر غثاه وعضه |
موجب اني مستريب وهايب من هرجة الخراطي |
قادرٍ نفسي عن اسناع الهوى واقدي البصر واغضه |
خابر راع الهوى ياقف بعسرات المواقف صباطي |
أبخص القصديره الصفرا من اشكال الذهب والفضه |
لكن المشطون مثلي عند اهل لولا يقال حباطي |
عبدالله بن دويرج |
|
