تعالي بالجفول وروضي بالك بلاش اجفال |
كفايه من عذاب الوقت والتفكير والريبه |
تعالي واتركي همك ووقفات الرجال جبال |
عليك الله وامانة والزمان اعرف دواليبه |
بلاش من التردد وش يجيب إلا شقا واهمال |
يا طيب اللي يحدد رحلته بالوقت يا طيبه |
تعالي واشربي صدق المحبة والغرام زلال |
ترى هداج تيماء صافيه لأجلك مشاريبه |
تعالي لا يحدك هاجسك ما بين جال وجال |
عساك إن ما رويتي للعطش وأصلف لواهيبه |
أنا سقت المحبة لك مثل ما ساقوا الفنجال |
على شيخ الرجال اللي ينومس في مجاذيبه |
شجاع ولا يرده عن لزومه معركة وقتال |
كريم ولا يرده قل ماله عن مواجيبه |
عديم وفي مواقفه العديمة يضربون أمثال |
ولله الكمال الناس ما تذكر عذاريبه |
وأنا لولاي أشوفك غير ما قلت الغلا لازال |
مثل ما قفّت الأيام مقفيةٍ مناديبه |
ولكن شفت فيك النزعه اللي بين حال وحال |
حداها وقتها والغيظ تقبل به وتقفي به |
وقلت أخذك في طيب وغلا والا عقل وهبال |
وخوذيني شجاع تطلبين النجم ويجيبه |
كلام الصادق اللي في متاهات الحجج ينقال |
لو أنه شاف جور الوقت ما غير مكاتيبه |
على وضح النقا والمرجلة لا قال قام وشال |
ولا يسري بليل من يبي يسري به |
يميز بالبداية والنهاية والثقال ثقال |
وخفيفات الأمور لواحد تقصر مجاذيبه |
عموم يا بعد كل الجروح اللي تمر البال |
تعالي واتركي خوف الزمان ووحشة الغيبة |
تعالي سلميني قلبك الصادق وفاله فال |
وأنا قلبي بكيفك راحته والا عواقيبه |
وخوذيني معك وانتي معي بالحل والترحال |
أبي حبي وحبك يالجفول الكل يدري به |
أبيه يصير حب عالمي واللي قصر ما طال |
أبي حب حديث الناس يصبح به ويمسي به |
هذا علمي وأبي رد الخبر لوهو ما هو بالحال |
معك وقتك وشوفي هاجس القلب ومطاليبه |
وأنا عذري معي بعض الغلا ماهوب راس المال |
حصيلك منه يالإنسان مهزلته وتعذيبه |
لأجل هذا شرحت لك الحقيقة والصحيح يقال |
وقرارك معك واللي يعجبك بالوقت غني به |
دحيم النومسي |
|
