بس لحظة يا مهملني وناوي في غيابك

دامك اللي ناوي الفرقا با أقول اللي با أقوله

انت يعني لا نويت تغيب با أقف عند بابك

لا وربي تاقف الدنيا وأنا (تأبى الرجوله)

ما تعوّدت اتبع المقفي ولو حضرة جنابك

رح عساها خيرة والدرب لك عرضه وطوله

روح لا جابك إمجيب الغيم واترك لي صوابك

جيت حلمٍ ورحت حلمٍ تشبه احلام الطفولة

ما أنت بأول من طعن هالقلب والدرب انتهابك

يا ثقل خطواتك البارح وهالليلة عجولة

باغي الفرقا!! جعل ربي يعجل في ذهابك

بايعٍ قلبٍ لك الله كنت ما تحلم تطوله

من يلومك..؟ شايف حالك وف .. بداية شبابك

طاغي تجرح قلوب الناس تحسبها بطولة

بسألك: كم واحد قبلي هقابك واشتقابك؟

انت ياللي نظرة عيونك قبل عرفك خجولة

يا كثر ما كانت ظنوني دخيل الله تهابك

بس أكذبها واقول أوهام والقلب وميوله

اثرك اللي تستلذ إن ذاقوا العالم عذابك؟

مشكلة!! والمشكلة هذي بسيطة وإمحلولة

كان ما لبّسَتك الغيرة مثل لبسة ثيابك

قل عوافي .. قل مثل غيره تركته وبسهولة

واجد اللي مشتهين الوصل والخط متشابك

كان لك جولة ترى محاكيك له تسعين جوله

لا بغيت تغيب فارق لا وربي ما درابك

شاعرٍ يا كثر ماتل القلوب وصفقوا له

لا هلا بك في حضورك .. في غيابك لا هلا بك

رح مهف امقيط يوم امقيط ودّنه إرجوله

باكر ان ما شفت غيرك جاء يعوضني غيابك

قل حكى شعار ما تفعل ربع هاللي تقوله

حمد السعيد

صفحة الجزيرة الرئيسية

رأي الجزيرة