يا هجوسي ولعيها نار في راس الفتيله

واسرجي خيل الفكر والسابقه تطلع بيدها

ما وردنا الا على عد قراح سلسبيله

والعدود الصافيه تروي ضما منهو وردها

يالله انا في ذراك من الغبينه والفشيله

يا عظيم تبعث اموات الجنايز من لحدها

اول الهمال قطره وآخر المال سيله

والمخايل في سماها برقها يسبق رعدها

من بغا درب العلا يرقا على راس الطويله

ومن سعى للمرجله بالعزم والهمه صعدها

ما ينول المجد رجال عظامه ما تشيله

كود من شال الحمول ونفسه الحقها جهدها

وارتكى مثل الجمل عند الخفيفه والثقيله

ينقض عقود الحبال ليا تلوت ويعقدها

صامل الزندين يحسب للزمن عدله وميله

يكمل حقوق الله المعبود ما ينقص عددها

واول حقوقه عمود الدين يا باغ الفضيله

الصلاه اللي فرضها في كتابه واعتمدها

ثم حق الوالدين وبرهم باحسن وسيله

طاعة اب له ربى وام تغذى من نهدها

ثم صون النفس بالايمان عن درب الرذيله

والوفا والصدق من سبة هنا النفس وسعدها

والرجل بين الخطيه والسنع عقله دليله

والخطيه وزرها للي غلط لو ما قصدها

ما درى بلجمره الا من نقلها في شليله

ولا يحس بقيمة النعمه يكود اللي فقدها

والمراجل قسمه ووهبات من منش المخيله

ما هي بحاجه تضيع ومن يدورها وجدها

من خسر بيض المراجل في شبابه عزتي له

ما كسبها لين موته يفرق الروح وجسدها

ما على الدنيا مع التوفيق حاجه مستحيله

لا اخلص الإنسان حسنات النوايا واعتقدها

قالها اللي صارع الايام والدنيا بحيله

الولع غنى بقلبه والسهر عينه جلدها

يشتري ويبيع همه كل يوم وكل ليله

ما يقول الكلمه الا حجته عنده سندها

ما مشى درب العيال ولا شقر صف القبيله

يشقح الاولى ويرفا الثانيه واللي بعدها

ما شكى همه لغير الله ولا يرجي بديله

جرب الدنيا وجرعته هناها مع نكدها

عوض القوانه

صفحة الجزيرة الرئيسية

رأي الجزيرة