مديت شوف النظر واطلقت حبل الشعور

والفكر خليت له بين الكواكب مدار

وجمعت من نادر الاشعار باقة زهور

فيها الشعور الاصيل اللي ما هو مستعار

حتى كتبت الولا نبت عميق الجذور

مشاعر صادقة فيها المحبة جهار

من فجر شوال والفرحه تحت كل دور

على محيا الكبار وفي عيون الصغار

يا شهر شوال مانت بمثل باقي الشهور

أولك كله سرور وكل ما فيك سار

ما فيك يا شهر شوال المسمى قصور

الا أنك ابطيت بالعشرين ليل ونهار

ما تدري انا على تاليك فينا سرور

ولا تدري انا كسبنا من هل الكار كار

وحنا نعرف ان حزات الوعد ما تبور

مير البطا بالتلاقي يشعل الانتظار

واليوم فجر الليالي في محياه نور

يوم ان وجه السعد يم الشمال استدار

واشوف نجد بسماها سحب وسم بكور

نشا من العارض الغالي لكل الديار

يا موكب الخير يا سلمان وأنت الحضور

اللي تباشر بخطواته ثرى كل دار

سلام يا رمز نجد اللي عليها غيور

حييت يا درعها عن كل ما يستثار

سلام يا عزها من ماضيات العصور

وحييت يا سيفها العادل حكيم القرار

سلام ياأمير ياللي فيك كل الامور

المعجزات بمعانيها الجسام الكبار

نجد العذيه ليا شافتك فيها غرور

عمارها فيك لاهانوا طوال العمار

ما دامها تحت ظلك وقتها ما يجور

يا ظلها اللي ما يقصر مع ظلال الجدار

يا سورها العالي اللي حافظ كل سور

يرد عنها الهبوب اللي تثير الغبار

يا شورها الصايب اللي لابغت منه شور

من واسع العرف والحكمه تدل المسار

بالسلم حلم وسيع ما حوته الصدور

يفرح بك اللي خصيمه وقت والوقت جار

والا ليا منها قامت رحاها تدور

عينك مثل عين ابو تركي تقادح شرار

صقر وجاذبك يا صقر تقود الصقور

يوم انه الله يبيحه قاد كل الحرار

عاش وحيت من حياته موحشات الدهور

ورحل بعد ما ملى الدنيا من الانتصار

حتى لو أنه رحمه الله بين القبور

مجده حشى ما ترجل عن ظهور المهار

يابو فهد وانت كل الخير فيك مخبور

مدات جودك على وجه البسيطة منار

ياما زرعت العطاء بارض خليه وبور

واليوم أهلها من أفضالك جنوها ثمار

من كثر ما جدت في يمنا طويلة شبور

قامت يسارك من اليمنى الكريمه تغار

حتى اصبحن كلبوهن يمن معنى ودور

صارت يسارك يمين ولوجهتها يسار

وزيارتك يا طويل العمر ما هي مرور

فيها عمار الصروح اللي يسمى عمار

مديت بين الرياض وما تبعها جسور

اللي تساعد على التطوير والازدهار

احلامك ارقام صعبه ما تحب الكسور

وافكارك العبقريه منير الابتكار

يارمز قصر وصوفه غير كل القصور

وسط الرياض ونشوفه بايمن الجدي جار

في كل يوم لنا من بيض أياديك طور

فعلك وفكرك يسوي للسنين اختصار

أي والله أنك علم ويشع باعلاه نور

وأي والله أنت (العلم واللي بعاليه نار)

والشعر يا سيدي سلمان فيك معمور

على محول أرضه البيضاء يعج الخضار

كد قالوا أغرف بحر بالشعر وانحت صخور

قلت أتهقوى على المعنى وقلته وصار

ما هو بطيب بشعري مير مد البحور

يمك ومن سيرتك غرفت سبع البحار

وان قصر القول فانا يالامير معذور

القدر يا سيدي أكبر من الاقتدار

والا أنت ما تختصر سيرتك جملة سطور

تاريخ تفرد له أوراق المعاجم وقار

طاريك لاحل ما خلا للأمجاد سور

واسمك لحاله يكفي للمكارم شعار

الله يديمك وارددها بصوت جهور

وتزورنا يا طويل العمر عدة مرار

ضيدان بداح المريخي

صفحة الجزيرة الرئيسية

رأي الجزيرة