هب الشتا وانتخى في نجمه شباطي |
يا زمهرير الشتا ليه متحديني |
البرد قاسي وضوي نورها واطي |
والليل خيّم وضيم الوقت حاديني |
والرجل تمشي وأخاف ان دربها خاطي |
يا عونة الله ومن غيره يقديني |
يا نفس قبل السفر ملزوم تحتاطي |
بالعلم والحلم والأخلاق والدّيني |
العمر يمضي على تفريط وافراطي |
واخاف من لحظة ما عاد يمديني |
يالله على حبل دينك وثق رباطي |
يا الله قبل لا يفوت الفوت تهديني |
جيتك سماها لحافي والثرى بساطي |
عايش بخوف ورجا عفوك يهديني |
رحماك رحماك يا وهاب يا عاطي |
ما غيرها شي للجنة يودّيني |
دنياي مثل البحر والآخرة شاطي |
يا الله على خير للشاطي تعديني |
منصور بن عبدالله المجيدل -الرس |
|
