يحتاج شرح المعاني نوع تدقيقي |
أما يجي صح ولا مالها خانه |
لو أنها دارجه من غير تبريقي |
في داخل الصدر شيء صعب كتمانه |
اليّمه جمع واشقابه تفاريقي |
وادرا على سيته وأدور أحسانه |
لولاي أرقيه في روس الشواهيقي |
يمديني أوميت بثيابي على شانه |
يبست لهاةٍ تعدت نشفت الريقي |
تنشب لهاة الجما في طارف السانه |
وأن هز غصن الغلا رجوى العشا شيقي |
يفتح له القلب قبل الصدر بيبانه |
الله يغيث العباد ويرفع الضيقي |
ولا الدهر مركبٍ والأرض عطشانه |
شهب الفيافي غدت جردٍ بلا هيقي |
عودٍ ذوى وأصرم اللاهوب بأغصانه |
رحماك ياللي برجواك المخاليقي |
في رايح يطّرد بالشوف غدرانه |
يرخي عقابه من الحره اليا طويقي |
ينج ماه الرغب وتفيض وديانه |
بدر بن ماجد بن ربيعان |
|
