أكبر قهر لاجيت تعشق لك انسان |
واللي تودّه ساهي ٍ ما درى بك |
وأكبر قهر تحلم وتحلم لك ازمان |
ويطيح حلمك ميت ٍ عند بابك |
وأكبر قهر تبني من سنين بنيان |
وتشوف بنّيك ما تعدّى ترابك |
وأكبر قهر تسقي من الورد بستان |
وتموت بين يديك زهرة شبابك |
وأكبر قهر تارد على البير ضميان |
وتشوف بعض الطين حايس شرابك |
وأكبر قهر لاحطوا الناس نيشان |
كل ٍ يزهب وانت ضايع زهابك |
وأكبر قهر ترهي على حصان خسران |
يوم السبق لا طحت كل ٍ حكى بك |
وأكبر قهر يوم انت ضايع وعطشان |
ونفس الطريق اللي يوديك جابك |
وأكبر قهر صاحبك لا جاك خوان |
لا بحت له بالسر راح ووشى بك |
وأكبر قهر تعطي وتعطي على شان |
تاخذ عقب كل العطايا حسابك |
كل ما سبق ذكره على الشوف ما كان |
حفنة حروفٍ مع بعضها تشابك |
ماهوب هرج ٍ يِعجَنْ بذهن ولسان |
ولاهوب عود ٍ يكسره حد نابك |
إن كنت فيما قلت تحتاج برهان |
ناظر وتلقى في قصيدي جوابك |
وإن كنت فيما قلت مخطي وغلطان |
أترك خطانا وانت عطنا صوابك |
فايز آل بذال |
|
