بالمختصر وايضاً بجملة مفيده |
اللي نساك انساه لو كان غالي |
دنياك فيها كم ليلة سعيده |
والعمر مايحسب بكثر الليالي |
عاش الآمل مطعون ينزف وريده |
ومن طبع حلمي في حياتي قتالي |
أنا حكاية من مواجع عديده |
لكن على ما قيل صدري شمالي |
في رحلتي دايم حوادث عديده |
ذكرتها من قبل يحصل مجالي |
يا صاحبي والعمر رحلة بعيده |
مشيتها باخطارها ما أبالي |
من عام تسعة والأماني زهيده |
والصبر طال وفاق زود احتمالي |
مرت على ايام سودا نكيده |
مر العمر فيها ووقف وطالي |
كان الفرح فيها هو اكبر فقيده |
رغم المآسي كنت داله وسالي |
رغم التياعي واندفاعي يزيده |
بقيت ثابت مثل صم الجبالي |
امشي واعيد الدرب وارجع اعيده |
تعب ولكن التعب له توالي |
تبقى جروحي والمدامع عنيده |
سألتها لكن تجاهل سؤالي |
شاعر نعم لكن بحالة فريده |
رغم اكتساح الحزن مرتاح بالي |
ترجمت بعض أحداث عمري قصيده |
طويتها واهديتها لارتحالي |
والصبر قالوا له: عواقب حميده |
صحيح من يصبر يطول المنالي |
بالمختصر وايضا بجمله وحيده |
ان العمر يمضي بمر وحالي |
عبدالله بن سمير الحربي |
|
