الحيا يبين ذكره من عسوسه

والرجال عسوسها طيب المسيره

أسمع الرجال لا تنظر البوسه

منطقه يعكس لك اللي في ضميره

لا تهيلك وقفته ولا جلوسه

ولا تغرك لحيته لو هي كبيره

لحية الرجال لو كان مهلوسه

ما تغير شيء من شره وخيره

استمع له واسأله واعرف هجوسه

يتضح لك يوم يدلي بتعبيره

كان لا منه تكلم صار حوسه

يزرق الهرجه بلا عرف وبصيره

ومع سفاهة منطقه نفسه عبوسه

هقوته ما ينوجد بالكون غيره

ويتعزوى لا هرج ويحد موسه

وانت منه تقول يا الله الستيره

اتركه يلقى وصيفه ثم يدوسه

والليال لقادمه تكشف مصيره

ومن هرج لك والثقه فيه مغروسه

وطبق المبدا الصحيح وفيه غيره

أجودي ماهوب للأعراض سوسه

رافعٍ نفسه عن الأشياء الحقيره

ما يسولف بالسواليف معكوسه

والنمايم لو سمعها ما تثيره

في حناياه المغاليق محبوسه

كان ما عدمها يخليها أسيره

استفد من خبرته وحفظ دروسه

ون بلشت بحل عقده تستشيره

لا تفرط فيه لو قلت فلوسه

احسبه من ضمن عراف العشيره

صويلح بن عبيسان الشيباني -الرياض

صفحة الجزيرة الرئيسية

الصفحة الرئيسية

رأي الجزيرة