زين فنجال تزهل به فلاحي
|
فالمسيل اللي وزن هضبة طميه
|
شب ناره قدم ميعاد الصباحي
|
الفجر والنار مشبوبه وحيّه
|
والقناد بدلة الرسلان فاحي
|
فوق جمر زين وقدت مجثويه
|
دلةٍ ماها من النقع القراحي
|
ما شراه من المياه المعدنيه
|
وصب فنجال مثل دم الوضاحي
|
الغزال اللي ربى نجد العذايه
|
وقدم اللي ما تقدمه الشحاحي
|
أفخر أنواع التمور السكريه
|
ولد للي من جحيم الجمر صاحي
|
وزود الشاهي شوية مرمريه
|
واستوى المجلاس والبال استراحي
|
وغيّب الهاجوس ما يطري عليّه
|
وزف ريح العشب ذعذاع الرياحي
|
أجود أنواع العطور العالميه
|
من نبات الوسم يوم الغيث طاحي
|
كل حاجر كن وسطه مزهريه
|
زين مد الشوف بالحزم البراحي
|
والتمتع بالسباريت الخليه
|
وزين شوف الطير خفاق الجناحي
|
يتنقل من شغيه في شغيه
|
وانبسط لاشفت جهجول الطياحي
|
لو مالي لاقعود ولا مطيه
|
رحلةٍ فيها وناسه وانشراحي
|
بالمسيل اللي وزن هضبة طميه
|
زهران عون الله المطيري- بريدة |
|
