خلاص مل القلب من جور الأحباب |
حب على هالحال أبطوي شراعه |
ما دام نام الصمت في حضن الأهداب |
وعقب الغلا زاد الجفاء والقطاعه |
راحت ليالينا مشاريه وعتاب |
حتى الكلام الزين نادر سماعه |
كلمة أحبك عندنا مالها حساب |
في وضعنا ما تنصرف يا جماعه |
والله تعبت وقلبي اليوم منصاب |
ذبلت غصونه وأقشر الهم صاعه |
حاولت.. ذابت في يدي كل الأسباب |
أخاف شمس الحب يطفي شعاعه |
المشكله قلبي بعد منه ما طاب |
لا زال يشكي لوعته والتياعه |
طيفه سكن بالقلب ما دونه حجاب |
هذا كلام الصدق ما هوب اشاعه |
يا ما عطيته من حناني بلا حساب |
ولا لقيت الا غرور ولكاعه |
وش حيلتي ياللي تحلون الأنشاب |
شخص أحبه ما يقلبه شفاعه |
لليأس باب وللأمل عدة أبواب |
بكره يطيب الجرح رغم اتساعه |
محمد الخربوش |
|
