|
طويل العمر بشر.. عسى كل شي زين
|
|
وابشرك بدعا الناس.. ربي يزيل الباس
|
|
دعا الناس لك ما فيه وحده من الثنتين
|
|
نشع مثل ما ينشع زراق الحبر قرطاس
|
|
لك الله كم عينن تضرع وكم يدين
|
|
يقولون: يا رب.. أذهب الباس.. رب الناس
|
|
وقدرك غرسه الله.. غرس الولا والدين
|
|
ولو كان من تحت السما.. بس فوق الراس
|
|
غلاك ومقامك.. يا حليف الندا واللين
|
|
هو العود في المجلس.. وهو سيرة الجلاس
|
|
ولو يبعد الله الثلاثا عن الاثنين!!
|
|
على قربهم - يا مكسر العود والالماس
|
|
فلا يبتعد طيفك عن الروح خل العين
|
|
سكن وأنت غايب.. فالنواظر وفالاحساس
|
|
ومن حبه الله.. حبب الخلق فيه إيلين
|
|
يصير المثل.. للناس.. والرمز والنبراس
|
|
زرعت وحرصت ولاعدمتك حصدت الزين
|
|
وتملكت فاخر كل طيب عليه يقاس
|
|
وانا بختصرها لك فديناك في بيتين
|
|
ومثلك يميز ريشه الفرخ.. والقرناس
|
|
على قولة العالم يجي فالسنة عيدين
|
|
وشوفك هو الثالث لهم.. يا عريب الساس
|
|
على خير.. يا حرز اليتامى.. تجي وآمين
|
|
نشوفك على العدلات طيب وقلبي حاس
|
|
العقيد - فهد بن محمد السياري
|
|
|
