لو غبت ما غاب طول العمر هوجاسك
|
مشاعر الود تسرح معك وتجيبك
|
ومشاعرك مثل ما اشعر فيك وإحساسك
|
ماهيب في حال تبعيدك وتقريبك
|
تأكد أني خذيت العلم من رأسك
|
في كل الأحوال مهما عشت تعذيبك
|
واخذ برأيك وأقيس بفن مقياسك
|
وأرجع.. وأراجع مع الذكرى مكاتيبك
|
أشوف للود مبدأ في سطر باسك
|
واضح ولو ما كشف عن غايتك غيبك
|
تقول لي لا يعيش الهم من يأسك
|
ومن قمة الطيب لا تقضي مطاليبك
|
خلي طموحك.. يفوق حدود مرواسك
|
تجاوزي بالهدف مضمون ترتيبك
|
وأنت الوفاء عالمك.. والشوق نسناسك
|
والصدق رمزٍ.. من رموزك وأساليبك
|
وما دام هذا.. وذاك.. وذاك نبراسك
|
من واجبي حفظ منزلتك وتوجيبك
|
يا غايتي من شعورٍ عايش إحساسك
|
أطلب على العز وألبي مطاليبك
|
فتاة نجد |
|
