يا صاحبي كانك علي تشره |
عمرك سمعت بفاقد الشي يعطيه |
السالفة ما هي مثل كل مره |
وما كل ما بالصدر لناس نبديه |
افتح زرار الود وارجع وازره |
اصارع ظروف الزمان وبلاويه |
بعض العرب ما تفيد فيه المبره |
حتى لو انك فوق نفسك تبديه |
يبين لك وقت الرخا والمسره |
وعند اللوازم مبعدات خطاويه |
كل يوم له درب كفى الله شره |
يمشي ولكنه على غير تاجيه |
ما ينفعك لو هو بمثقال ذره |
يا قل حسناته وما كثر مساويه |
وان غبت عن عينه غسيلك يشره |
من يسمعه يقول كنّك معاديه |
وبعض العرب ياناس لله دره |
لو انك اتحطه على الجرح يبريه |
يا صاحبي والوقت حلوه ومره |
لا بد ما تجري علينا لياليه |
كل مع الأيام يظهر مصره |
وكم واحد حاضره يشفع لماضيه |
ومن لا يقدم بالزمن ما يسره |
على طريقه يكثرن المشاريه |
والي عن الطولات نفسه تغره |
يموت ما حدن جاب ذكره وطاريه |
عطا الله ممدوح المضياني - الخرج |
|
