ليت الليال تعود والشمل يلتم |
يلتم عقب البعد شمل الرفاقة |
اللي زميل لي وصديق وابن عم |
وكل غالي بيني وبينه علاقة |
ربع دواخلهم كما صافي الجم |
ربع على الناموس فيهم شفاقه |
وقت الشدايد لو تبي فزعة ازهم |
لاضامتك دنياك وان جتك فاقة |
واحدهم إليا جاك قال: آمر وسم |
لو تطلبه دمه على طول ساقه |
ما هو على حسب المخاسير يهتم |
في نفعة اصحابه تجيه انطلاقة |
وجه سميح وذرب لامن تكلم |
ولاجيت له تلقى بوجهه طلاقة |
ما يسمع العوجا ولايسمع النم |
ولا يغير منهجه هرج عاقة |
لكن ظروف الوقت ما عاد ترحم |
دنيا تجمعها سريع فراقه |
وارجع اقول يالله عسى الشمل يلتم |
وإلا الصبر ما عاد لي فيه طاقة |
سلطان بن سعود بن مفرج ابو ثنين |
|
