سلامة اطهر بقاع من الصواب وعمار |
سلامة الارض وجذوع الشجر والنخيل |
سلامة اللي يرفرف كل ليل ونهار |
الشامخ اللي تميل اعلامهم مايميل |
والحمد لله يثنى لاضرر أو ضرار |
طبنا ولله فضل والثنى والجميل |
ياسيد الجود نبراس الغلا باختصار |
وحشتك تملا محاجرنا فياض وتسيل |
بعروقنا من شغفنا جاري الانتظار |
والشوق خيلٍ بروض الصدر تصهل صهيل |
مدك بحور وفياض احسان كفك ديار |
وافعال عجزت تصورها بحور الخليل |
الله إليا حب عبده يبتليه اختبار |
يانبع الاحسان والايمان صبرٍ جميل |
عضدك لسود الليالي ياضيانا فنار |
(سلمان) دايم ورا الهقوه زبون الدخيل |
من ماكره لاسما الامجاد والعز طار |
ومواقعه ماعن طوال الشوامخ بديل |
وقفة شرف بالبنان لمن وقفها يشار |
تجسيد عمق التلاحم والشعور النبيل |
صورة رسمها بحسه للملا باقتدار |
في سابقة سجلت لابن الاصيل الاصيل |
إلا رواية كبار تعدها للصغار |
تروا مع ازكى سلام لجيل من بعد جيل |
يافخر نجد وشروق المجد يا ذا الوقار |
يا تاج روس المكارم يالنسيم العليل |
اللي عليك بغلاها من غرامك تغار |
فيها ماعزم طميه من غلا للرحيل |
تصبح على الشوق وتثور المشاعر شرار |
ويسري بها الليل لافل بسماها الجديل |
سعود بن بادي |
|
