هلّ الخيال وطال كل النواحي
|
مزنٍ حقوقٍ صادق النمو هتّان
|
شعاع برقه في سما العز لاحي
|
ونور السعادة والفرح زال الاحزان
|
والدار لبست من فرحها الوشاحي
|
يومه تعافى سيّد الجود سلطان
|
لبست حللها وازرق العود فاحي
|
وطير السعد غرّد على ذيك الاغصان
|
شيخ الكرم طير السعد والفلاحي
|
للطيب مدهال وللمجد عنوان
|
فضلك شمل يامير كل الضواحي
|
يابو المكارم والفضيلة والاحسان
|
كل المثايل عن وصوفك شحاحي
|
ما يحصي امجادك قصايد وقيفان
|
اخذت في راس الطويله مراحي
|
يا راعي الطولات يا طير حوران
|
الشر جعله عن طريقك يزاحي
|
والخير يبقى دربكم كل الاحيان
|
انتم هل العوجا طوال الرماحي
|
عيال من حرر بلاده بالايمان
|
عبدالعزيز الصيرمي ما ستراحي
|
حتى جعل ذيب الفلا يصحب الضان
|
جاها وبدل ظلمها بالصلاحي
|
ومشى بحكم الشرع سنه وقرآن
|
والخير ساد وبيرق الشر طاحي
|
وشعب الجزيرة صاروا اليوم خلاّن
|
حل العدل والظلم قفا وراحي
|
وبعد التناحر بينهم صاروا اخوان
|
بفضل العديم الحر طلق الجناحي
|
من بعد توفيق الولي عالي الشان
|
يالله يا مجري هبوب الرياحي
|
يصير مسكانه بجنات رضوان
|
ويالله تبقي غارسين النجاحي
|
انجاله اللي فضلهم عم الاوطان
|
شالوا عن الشعب العزيز الجراحي
|
وساد الهنا والعز في كل الاركان
|
أمن وأمان وبهجة وانشراحي
|
الله يبقي سعدها طول الازمان
|
ولجل الوطن حنا نشيل السلاحي
|
أرواحنا تفنى ولا الدار تنهان
|
كان العدو كثّر علينا الصياحي
|
فعل السعودي ساعة الحرب ينبان
|
عدونا نسقيه سمٍ ذحاحي
|
وصديقنا يرقى على راس ما بان
|
صديقنا نسقيه عذبٍ القراحي
|
وعدونا يلقى مذلة وحقران
|
والجار لا قلت عليه المشاحي
|
يعرف صنايع فعلنا وقت الاكوان
|
ودليل قولي فزعة للصباحي
|
فهد وعد جابر وعوّد لدسمان
|
انتم هلا المجد الرفيع الشناحي
|
من ماضي الدنيا الا وقتنا الآن
|
والمجد يبقي ما محى المجد ماحي
|
مجد شهد به كل مبصر وعميان
|
صالح محمد العنزي |
|
