أبدأ بذكر اللي بالأسرار علام |
عالم عليما موجدا من عدمها |
رب يكون كل شيء من أعدام |
نفوس خلقه في يده مستلمها |
عودتك وأنت بخير من كبر الأنعام |
بإرادة المولى تواتر نعمها |
سلطان خير بخير الخير مقدام |
محبته بقلوب شعبه رسمها |
يا مرحبا عداد تحطيم الأرقام |
رقما تحداها وزاد وحطمها |
سلطان أبوخالد كعاما للأخصام |
خصم الخصيم اللي خصومه خصمها |
عذب وقراح وصعب هين وجزام |
يمنا يصافحها ويمنا لطمها |
المملكة داري وتنعم الإسلام |
لي الفخر وله الفخر من خدمها |
نبقى سعوديين سادة وحكام |
منا حكم حاكم حكيما حكمها |
ناطى على رؤوس الافاعي بالأقدام |
ناطا عليها لين تقطع ضرمها |
عبدالعزيز اللي بدأ الدرب قدام |
ثبت قواعد دولته ما هدمها |
قبل يجيها في تزعزاع وأوهام |
الظلم واجد والجهالة طعمها |
جزيرة رملا تهدد بالاعدام |
عريانة تمشي وحافا قدمها |
دايم وهي ما بين بايع وسوام |
ما حدا عرف وجودها من عدمها |
وبإرادة الله يوم نصره لها قام |
بحنكته عبدالعزيز اغتنمها |
شامت لابو تركي وهو مثلها شام |
وبالمسك والريحان ذعذع نسمها |
استسلمت في يدين مرودنت الاكمام |
وتساوت الصحراء وعالي قممها |
عبدالعزيز اللي لها درع وحزام |
بالدين والشرع الحنيفي حزمها |
في طاعة الله قوم الفرض ثم صام |
وبكلمة التوحيد رفرف علمها |
واليوم أبو متعب لها درع ووسام |
تنشر له البيضاء بعالي قممها |
رجل الأمان بخدمة الدين ما نام |
من حلو طعم النوم عينه حرمها |
أبوي وأبو الشعب وأبو للأيتام |
وأبو الشعوب اللي يضمد آلمها |
تمت وصلى الله على خير الأنام |
عداد من لبى وطاف بحرمها |
ماجد بن هاجد الحنتوشي العتيبي |
|
