الصاحب اللي كان مشغلني برد الأسئله

حتى سكت.. وبعدها صار السكوت أفضل جواب

كم قلت له: مثلي عن ألوان العمر لا تسأله

أنا تساوت عندي ألوان السعاده والعذاب

أنا حياتي مالها إلا لون واحد.. وأجهله

خليط من لون الهواء والنار والماء والتراب

ما مر في عمري مراحل!.. كل عمري مرحله

في كل عمري كنت طفل وكنت كهل وكنت شاب

أصير شايب يوم أحس إن المقابيل أرمله

وأحيان أحس إن المقافي طفلة وأرجع شباب

أنا الغريب اللي جميع الناس به متأهله

وأحيان أنا اللي خاطره من عرف كل الناس طاب

ماله شبيه إلا السكوت اللي يثير البلبله

ومالي نقيض إلا الكلام اللي يسمونه هباب

أبكي على حالي لأني ما قدرت أبكي وله

وأضحك على حالي لأني ما قدرت أضحك عجاب

بين الأماني الماضيه والذكريات المقبله

أمشي وخطوات الحضور بسكتي جرة غياب

أتمهل إن مرتني أيام الرخاء مستعجله

وأقول لو تقبل علي بالمال: يا مال الذهاب

قدرت أعيش الواقع اللّي ما قدرت أتخيله

مدري أصبت العذر أو في عذري أخطيت الصواب

بس المهم إني قدرت اضرب لغيري أمثله

وشلون ما يرجي ثواب الصدق أو يخشى العقاب

ما هو غرور ولا تواضع كل ما في المسأله

يا صاحبي.. إني رفضت أحسب لغير الله حساب

طرد السراب لمن يحسبه ماء.. ما هي مشكله

المشكلة طرد السراب لمن يعرف إنه سراب

رشيد الدهام

صفحة الجزيرة الرئيسية

الصفحة الرئيسية

رأي الجزيرة