لاح براق الحيا من مزنة(ن) ملتفه
|
و(الحيا) لولا (الحياء) ماغاب عني طيفه
|
ياربيع القلب ياغيث الحشا ياشفه
|
راح وسم العمر لا يقفاه بكره صيفه
|
الحقه لاتتركه شهب السنين تدفه
|
للسنا قبل الفنا وانته هواه وريفه
|
لد فيه وحن له واعطف عليه وضفه
|
وانفردبه وانشده عن قصته مع ضيفه
|
جيت واللي جاء على باله مراسم زفه
|
وغاب عقله ثانيه وحده ما غاب بكيفه
|
شف بنفسك في غيابك من وقف في صفه
|
غير وجه(ن) كل يوم يمر يكشف زيفه
|
عطه مثل اللي عطا حتى تساوى الكفه
|
وانتبه للجاي واللي ضاع ضاع إرشيفه
|
وان بغيت تعوضه وافي يا رمز العفه
|
مدة النفس الكريمه ما تصير ضعيفه
|
لامسه في غيبتك من جور وقته حفه
|
ونقص ما هو نقص ربيه ولا تعريفه
|
فاقد الحلم الثمين يجيه مثل الخفه
|
لو هو أثقل من جبال طويق في تصنيفه
|
يحبطه لوم البليد اللي يعيش مرفه
|
والظروف أقوى من أفكاره ومن تصريفه
|
شفت كيف الوقت دار وكيف أخذله لفه
|
والامال تعود لو إن الظروف مخيفه
|
ويا ربيع القلب يا غيث الحشا ياشفه
|
راح وسم العمر لا يقفاه بكره صيفه
|
فراج الكرشمي |
|
