خفق قلب الجزيرة وانتشت نجد مع الافلاج
|
وجاوبها جنوب المملكة واقصى شماليها
|
وهنّى الساحل الشرقي الحجاز ومهبط الحجاج
|
وهنّى الحاضر الغايب ودانيها وقاصيها
|
مشاعر حب يوم الحب له وسط الحشى ميلاج
|
واحاسيس ٍ تلاطم موجها وْضجت موانيها
|
نبض قلب الرياض لجيّتك ياطيب المنهاج
|
وفزت دار ابومتعب ومدت لك أياديها
|
هلا يامرحبا يامسهلا يافرحة المحتاج
|
كثر ماحبك بكل القلوب البيض ماليها
|
هلا يافزعة المضيوم في ليل ٍ بهيم ٍ داج
|
هلا يا ابوفهد كبر البحار وكثر مافيها
|
هلا كثر السحاب اللي ملى سودة عسير وداج
|
وساق السيل للوادي وشقّ العشب اراضيها
|
إلى من ضاقت الدنيا على اللي يطلب المخراج
|
نصى الله ثم ماردّه أحد غيرك يجليها
|
هلا.. جاتك من قلوب ٍ تحبك حب مايحتاج
|
عجز كل الشعر واصدق شعور يجيب خافيها
|
هلا بك كثر ماقالوا عَنِك قرم وطليق حجاج
|
هلا ياعز دار العز.. سيدها ورافيها
|
هلا يالبرق الابلج في العتام ونوره الوهاج
|
هلا ياعزوة اللي عزوته ماتوا عوانيها
|
هلا ياتاجنا اللي ما أبد مثله لبسنا تاج
|
هلا باميرنا (سلمان نجد) وعز اهاليها
|
هلا يا بلسم اللي مالقى في هالزمان علاج
|
على وجهه يهيم بدنية ٍ شانت هقاويها
|
تغنّي وازعجي بالصوت يانجد الشموخ ازعاج
|
ترى ذا أكرم كرام العرب واطيب مجانيها
|
مالومك لا اكتسيتي بالحرير وحلة الديباج
|
وبشّرتي حواضرها وبشّرتي بواديها
|
مالومك لانثرتي الحب في دربه فرح وابهاج
|
وحضنتي هامة الغالي وقبّلتي نواصيها
|
ورددتي اسمه الشامخ بكل ارض وبكل فجاج
|
وزيّنتي الشوارع بالفرح لعيون غاليها
|
ياكثر اللي يحبونك زرافات ٍ تقول امواج
|
ملوا قصر الحكم يوم الرعّية طاب راعيها
|
وملوا قصر الوفا ليل الثلوث افواج عقب افواج
|
يسوقون الغلا يمّك وجاوك من نواحيها
|
وخفق قلب الرياض ورحّب الوادي مع الأفلاج
|
وجاوبها شمال المملكة واقصى جنوبيها
|
محمد بن راشد بن محمد آل حبشان |
|
