حاولت أصارحك لكنك خذلتيني |
ومن يزرع الزرع يحصد دايم إنتاجه |
مرت وصارت.. ولو والله يمديني |
ما أحط نفسي بهالموقف ولا إحراجه |
أسلوبك أوحى بقلبٍ فيك شاريني |
ومختارني وما له بغيري أبد حاجه |
ولهالسبب جيت كلّي مو بيدّيني |
أبيك لإحساسي من كل البشر تاجه |
وما نيب خسران إنتي اللي خسرتيني |
والحظ فيك وبدونك رافع حجاجه |
لا صرت ما هم مثلك.. ما تهميني |
ولا نيب مجروح وأرجي لجرحي علاجه |
وكاني تسرعت بس أرجوك تعفيني |
واهم تأمل.. ويتأسف على إزعاجه |
ماجد بن علي |
|
