الشعر دربٍ خذاني لين وداني

ابعد مسافات من كوني وتكويني

وقفت في شرفته وأوجست خذلاني

وأخذت أحسّب خساراتي من سنيني

لقيتني ما ربحت إلا صدى أحزاني

وآمالي اللي تبعثرها عناويني

وحلمٍ خذاني معاه ولا تحراني

عند اقرب أول محطة غاب عن عيني

وعوّدت بالذاكرة لأيام خلاني

وأصحابي اللي رووا بزلال كفيني

ومرت عليّ الوجيه اللي تمراني

وقمت افرز أشكالهم وألعن شياطيني

يا كثرهم وقت حاجتهم لميداني

ويا قلّهم بعد ربحوا من مياديني

والصاحب اللي نبت ريشه بجنحاني

وقت الهدد بار صيد القوم بيديني

ما يدري انه خفيف الريش ما أشقاني

ولا نوّخت في حراه اهزل بعاريني

الطيب روضٍ عليه أسست بنياني

والمجد انا ابنيه والنوماس بانيني

يوم إن غيري مناه يشوف حقراني

انا اعترف في نجاح اكبر معاديني

ما عشت دور الضعيف ولا تعداني

إلا حصانٍ بطمراته يحاليني

ورفيقي اللي على الهقوة تمناني

يبشر بعزه لو أنحر له شراييني

على جزال العطايا ابوي رباني

الله يرحم عظام اللي مربيني

والحاسد اللي مع الغبشة تقهواني

من مره اسمي شرق بأول فناجيني

ذكري ليا جا يقوم بدور نيشاني

وان غاب ذكري تمني يا سكاكيني

والشعر خيلٍ عليه أسرجت قيفاني

أعطيه جهدي ولا انطر ويش يعطيني

بنيت قصري بمشرافه وبيباني

وعليه وسمي مثل وسم البعاريني

نايف المطيري

صفحة الجزيرة الرئيسية

الصفحة الرئيسية

رأي الجزيرة