لا نشدني صاحبي وشلون حالي

اختصر ردي بقولة ما عليّه

ويعلم الله كن وسط الجوف صالي

وكن نارٍ بالحشا تشتب فيّه

يوم صارت فتنة اصحاب الظلالي

ودي اكتب من قوافي الوصيّه

في سبيل الله نذوق المر حالي

ما نذل ولا نخاف من المنيّه

الله الرحمن ربي ذو الجلالي

حافظٍ ارواحنا من كل سيّه

من جنوب وشرق والا من شمالي

لين حد الغرب ما نخشى الاذيّه

نتكل بالله نعم الاتكالي

ربنا المعبود خلاق البريّه

حافظين نفوسنا باول وتالي

بالرخا والا الليالي السرمديّه

اليا انتخينا عزمنا يهد الجبالي

نرتطم بالموت وندق التحيّه

لو صواريخ العدا من كل جالي

ولو تثور الحرب حربٍ عالميّه

عزمنا ثابت على مر الليالي

ما نتوانا دام هذي الروح حيّه

لنصرة الاسلام ما فيها جدالي

لا احتمى الموقف لنا وقفه قويّه

الوطن يا اهل الوطن بالحيل غالي

دونه الارواح لو راحت هديّه

تحت ضول الحرب ناقف ما نبالي

بالعتاد وبالبدال العسكريّه

نلتزم بالامر لاصحاب المعالي

ما عصينا من يقودون السريّه

الله اكبر وسط ساحات القتالي

نعتزي به صبح والا بالعشيّه

نحمد الله يوم كيد الشر زالي

والردا عوّد على راعي الرديّه

عادل بن سليمان المخلفي

صفحة الجزيرة الرئيسية

الصفحة الرئيسية

رأي الجزيرة