يخص سمو الأمير الشاعر الدكتور سعد آل سعود (مدارات شعبية) بآخر ما كتبه من إبداع يستعصي على حصر جمال آماده الشاسعة مهما تفاعلت الذائقة مع بصمة إبداعه التي لا تشبه إلا (منادي):
|
أحبابك أحبابك.. اللي مالهم غيرك |
لا عاد تستغرب إن غابوا بلا رجعه |
يا صاحبي.. ريّح إحساسك وتفكيرك |
الحب يمسح مثل ما تمسح الدمعه |
وش عاد.. لو خان صوت الحب تعبيرك |
أحباب لو تنطفي بقلوبهم شمعه |
وش عاد.. غير الجفا ورياح تغييرك |
وش عاد غير الحزن والجرح والفجعه |
ياغربة الحب بان اليوم تأثيرك |
ياشينه أسبوعنا.. وأيامه السبعه |
لا تطري البعد.. قالتها تعابيرك |
ولا تطري الوصل والآمال منقطعه |
يا صاحبي.. قبل شرهاتي وتبريرك |
كانه خذلك الغلا.. ما فالغلا طمعه |
عاشقك لو صارت أشواقه معاذيرك |
يمر صوت الغلا فالبال ما سمعه |
لامات قدر الغلا.. لا عاش تقديرك |
مادام ينسى الوفا من الوفا طبعه |
يا صبح الأحباب لو طارت عصافيرك |
تغريدها حزن والأشواق مصطنعه |
سراب الأيام.. ما تصدق مشاويرك |
من خانه السبت.. كيف بيامن الجمعه |
هو الزمن ياهوى.. فرّق جماهيرك |
وإلا الهوى يا زمن.. أحزان مجتمعه |
يا صاحبي.. والقدر شره غلب خيرك |
أحبابك أحبابك.. وغابوا بلا رجعه |
سعد آل سعود |
|
