إنشرح بال القصيد وقلت أشيل لحونه

كود يدري صاحبي عن سر ضيقة بالي

وأمطرت فوق الورق عذريةٍ مجنونه

شفت عقلي واصلٍ فيها حدود هبالي

واعساي أرضي غروري وأرضي المزيونه

لين أشوف إن الزعل ولَّى ولاله تالي

يا حبيبي كل طيرٍ ماله إلا غصونه

وإنت قلبي لك غصونٍ مورقه وضلالي

الفراق صعيب لكن الوصل ياهونه

بس يكفيني ليا من قلت كيف أحوالي

إن تعمدت الجفا هذا الهواء وشطونه

وإن تخيَّرت الفراق أقول يا عزَّالي

يوم أحبك ما تخيَّلت الهواء وشلونه

شفتك الحب الزلال وقلت دوك حبالي

إن رويتك ما سألت الماء متى يردونه

لو توديني دروبك للطريق الخالي

ما شكيتك والجفاء تهدي عليّ طعونه

ما دروا عني محبيني ولا عذَّالي

يوم مجناك البحر وأصدافه المكنونه

كيف تنسى يوم أنا جيتك وموجه عالي

داوني بالوصل وارحم روحي المرهونه

وإن تخليت إنت عن دنياي وش يبقى لي

من سمع كلمة هلا من مبسمك وشجونه

وش يسوّي لا سمع يا مرحبا يالغالي

الشاعر ضيدان المريخي

صفحة الجزيرة الرئيسية

الصفحة الرئيسية

رأي الجزيرة