ما تمر أيام

إلا واستردّك من يدين الليل

شمس وجاذبيه..

واقطفك من سدرة أحلامي

وأغيثك من مطر روحي

وأعيشك

يالبتول المجدليه..

المنافي ما تطول إلا بدونك

وأي منفى يشرق بساحل عيونك

ما يكون إلا وطن

يعني وطن

يعني هويه..

استضيفي اليوم ضعفي

وامنحيني غفوتين من الرضا

وبالٍ وسيع

محتاج أضيع بعالمك

وأنسى المدارات الشقيّه..

آه يا شهد الحيا

ويا رحيق الكبرياء والنرجسيه..

آه لو يحكي التعب عن سيرة

أوجاعي

ويترك موجة أطباعي تبدع في

سكوتك

آه لو أقدر أموتك

وأهجر الدنيا الدنيّه..!

الأماني ذل يا قلبي

وهذا الواقع جراح وخطايا

والصبايا راحةٍ بين المذلّه

والخطيّه..

ريحيني يا بنيّه

لي سنين أحبس دموعي

ولا هطول ولا مسيل

وين صدرك عن سرايا الحزن

فيني

عن حنيني والصهيل

توهتني الماضيات بزيفها

والنوم عيَّا

والثرى جافا وجافتني الثريا

وجيتك وحلمي ثقيل..

يحتفل بي الهم

معدوم وبخيل

نافض كفوفي

وشوفي ما بقى بي غير شاعر

وباقي العود النحيل..

ولا تلوميني أنا أدرى فيك

ما يكفيك لكن اعذريني

ما لهذا البوح يا بوحي بديل!

وش لبستي لموعدي غير الطنون

الزاهيه

وش تهيلتي لقربي من مزاج

ومستحيل..

أي عطر اللي تضمّخ من ثيابك؟

وأي صبر اللي تفتت في شبابك

وأي حبر اللي بيكتب آخر أخبار

الدخيل..

شرذمتني طيبتي

ومن غيبتي لمّيت لك بعض

الغصون اليابسه

وبعض الدفا

لا تنعتيني بالجفا وقل الوفا

مثلي وربك ما يموت إلا أصيل..

ومثلك بيذكرني أكيد

إن شعشعت شمس الضحى باكر

صمتي قصيد

عابر سبيل..

حلّ ورحل

وحل ورحل

عابر سبيل

وحلم يبادلك التحيه

وأبا أذكرك

إن غبت في حضن الهموم

في كل يوم

أبا استردك من يدين الليل

شمس وجاذبيه..

وأبا أقطفك من سدرة أحلامي

وأغيثك من مطر روحي،

والحسره عروس يزفّها لي حظ

يالبتول المجدليه..