Al Jazirah NewsPaper Friday  09/07/2010 G Issue 13798
الجمعة 27 رجب 1431   العدد  13798

هجينية

البارحه كني المحبوس

ألوج والهم ماياوي

مراتٍ امشي ونوب جلوس

لاني بعاشق ولا هاوي

ماقوى على جرّة المنكوس

ظمايري ذيبها عاوي

دنياك هذي عبر ودروس

والعهده ترجع على الراوي

ياناس بعض البشر منحوس

من وين ماراح حجناوي

كانك تبعته يحوسك حوس

غاوي ومن يتبعه غاوي

دايم قراره ماهو مدروس

ونهاية الوضع مأساوي

ينفذ الراي بالمعكوس

ويدوخك في صوته الداوي

تعبت انا افتش القاموس

حتى طوى خافقي طاوي

لكن ترى الواقع الملموس

يقول (مايرهم) تداوي

اللي سواته دواه الموس

تقطع علاقتك بالخاوي

حتى ولو غيّر الملبوس

لابد يطلع لك يلاوي

وبيتٍ سمعته وهو محسوس

واظنه الوضع متساوي

(لاصار ماترفع الدبوس

ماينفع الطيب بالشاوي)

ويالله ياحي ياقدوس

ياعالمٍ ويش انا ناوي

ياخالقٍ جنة الفردوس

ابعد طريقي عن الغاوي

شعر: عطاالله بن ممدوح

 


صفحة الجزيرة الرئيسية

الصفحة الرئيسية

رأي الجزيرة

صفحات العدد