الشعراء السعوديون في أجيالهم المتلاحقة يصورون باعتداد متفرد مؤسس وطنهم الشامخ الأبي وكما تطرقنا لجزء منهم، نوثق هنا بعضاً من روائع الشعراء المعاصرين في هذا الشأن العزيز على نفوس جميع أبناء المملكة العربية السعودية..
قال الأمير عبدالله الفيصل عندما زار قبر الملك عبدالعزيز في مقبرة العود بالرياض:
سلام يا قبرٍ بنت فوقه الريح
قبر العديم اللي كعم كل عايل
حِلّلْت يا مضحك وجيه المفاليح
ومبكي الضديد اللي من الزود صايل
داويت بالحسنى جسومٍ مجاريح
وبالجود صفّيت القلوب الغلايل
وقال الأمير خالد الفيصل:
عبدالعزيز.. يامنية الأبطال في اليوم العظيم
عبدالعزيز.. يا دعوة المظلوم في الليل البهيم
يا باعاث الأمل البعيد
يا طلعة الفجر الجديد
يا مسترد الملك
والمجد التليد
من يوم التوحيد الأول
أعلنها دعوة صلاه
من يوم التكوين الأمثل
أعلنها مبدأ حياه
لا إله إلا الله محمد رسول الله
وقال الأمير خالد بن سعود الكبير:
دار يا منبع شغاميم الرجال
يا عرين الأسد والأصل النبيل
يا منار الفكر في بحر الضلال
يا فنار العلم والدين الفضيل
كم عظيمٍ جال لعيونك وصال
واعتزى في حومة الخطب الجليل
إسألي تاريخ ذربين الفعال
أربعينٍ فعلهم ما له مثيل
قادهم حرٍ عليه الضيم طال
ما هناه العيش في ضف القبيل
الشكاله والعقل تاج الخصال
حاشها رأسه وهو توّه فصيل
والقرامة تشتعل فيه اشتعال
لا يهاب ولا يلين ولا يميل
ذاك أخو نوره عديمٍ في الرجال
حنكته وسياسته شيٍّ يهيل
كرّتينٍ كرّها حرب وسجال
واستعاد الحق والمجد الأصيل
والحرايب يمتحن فيها العيال
يستعز القرم ويذل الذليل
والصبر والحزم تاليه النوال
والعزايم طوّحت بالمستحيل
وقال الأمير الشاعر سعود بن عبدالله:
هجن وخيل.. عشق مع شوق وأمل
ليل طويل.. لونه مثل لون الكحل
منّه سرى عبدالعزيز. وبعده طلع صبح جديد
وردة ربيعٍ تبتسم.. في يوم مولدها المجيد
في الموعد اللي تنتظر.. عذرا نخت رجالها
ما عاد حسّب للعمر.. نادت له ولبّى لها
وقال الشاعر عمير بن زبن:
خاض المعارك صدق رجلي وخيَّال
عبدالعزيز الفيصلي العصامي
أرج الذي نزل تبارك والأنفال
يحط له بالخلد عنده مقامي
ما راح لين أنجب خلافه له أشبال
يردون حوض الموت ورد الضوامي
وقال الشاعر فراج بن جلبان:
حالة بلدنا كل حي يخبرها
قدام أبوتركي يجيها بشيره
أهل أرضها مثل السمك في بحرها
يأكل كبيره ما مسك من صغيره
وسخر لها الله من بعد له صخرها
وتلابدت كل الحوايم لطيره
جاها مجاهر خاطبٍ ما غدرها
وفرحت بزيزوم الوجيه السفيره
وقامت تزين له وتمشط شعرها
وفي حضنها الدافي تزين سريره
واللي لها رايم منوّل نفرها
حبت معزي ودخلت في حجيره
وله قابلت وأعطت خصومه ظهرها
وقالت لكل الناس ما أريد غيره
