يا الله يا اللي كل شيء درابه

يا جامعاً خلقه نهار القيامه

يا حي يا قيوم منشي سحابه

يا محصيا خلقه ويفهم كلامه

سر يا قلم واكتب بحسن الكتابه

أبيات شعراً ما يجيها ملامه

مشاعراً جاشت بصدق وصلابة

تحمل مقاييس الغلا واحترامه

يا مرحباً باللي لفا من غيابه

الحمد لله يوم جاء بالسلامه

أمير نجد اللي كريماً جنابه

بحر الندى ساس الوفا والشهامه

راعي المكارم كلها والمهابة

ابن الزعيم وفي محل الزعامه

سلمان غيث الملتجي عند بابه

الملتجي والمشتكي في دوامه

المشتكي يعطيه حق الطلابه

والملتجي يلقا الوفا والكرامه

لا جاه مظهود الدهر والتوابه

فرج همومه واهتنا في منامه

هو فزعة المحتاج يوم اعتزابه

إذا انغرس ناب الدهر في سنامه

نور الرياض اللي يجلي ضبابه

اللي بقصر الحكم ترفع أعلامه

ستين عام وأبو فهد في شبابه

ما فيه يوم قد تغير نظامه

من هيبته كلاً يحسب حسابه

واليا تكلم لا يقاطع كلامه

يعجز لساني والقلم والكتابه

بخصال شيخاً وافي في مقامه

والطيب في سلمان ما به غرابه

تاج الشرف والمجد يحمل وسامه