لا تعذلون اللي يزور المداهيل

لو ان ماله بالمداهيل حاجه

لو خدّها ممحل ولا علّه السيل

ويهب نوده ويتركّز عجاجه

عنده تساوي شط دجله مع النيل

وفيها عناه وسلوته وابتهاجه

يشتاق شوف رسومها لا اقبل الليل

شوق المفارق لا انتظر للمواجه

في سجّته يلقى رموش وتماثيل

لا شافها يدله ويضحك حجاجه

تغنيه عن مجلس هل القال والقيل

وسوالفٍ بين العيا واللجاجه

يلقى بها من ضيقة الصدر تعليل

لا جار به وقته وكدر مزاجه

كنها تقول اصبر على الهم ويزيل

والضيق له عند الولي انفراجه

والغيب علمه بالليال المقابيل

وكلٍ على ما قدّر الله يواجه

الشاعر - خليل بن هدلان