والله إني على فرقاك ماني صبور
كيف ابصبر وجرحي من فراقك يزيد
من فراقك تعبت وصاب جسمي فتور
والمداوي اللي جاب الدواء ما يفيد
وانت ساس العلاج وما يجيب السرور
كل قلبٍ يشوفك لان لو هو حديد
الجمال احتكرته مير عندك غرور
الجفاء للحبايب منه وش تستفيد
المحبه تفاهم مع تبادل شعور
وانت دايم على مغليك راسك عنيد
لو تعذرت لي يا زين منت معذور
شلت ذنب قديم وشلت ذنب جديد
يا حبيبي جمالك جاب خافي الصدور
وانت من مات من سبتك أضنه شهيد
جادل ما تحط النقش وسط القصور
في الجمال الطبيعي مثل ظبي فريد
بنت شيخٍ اليا جاء واجبه ما يخور
فاتحٍ باب ديوانه ورايه رشيد
الكرم ميزته والطيب فيه مخبور
كل ما طالت الايام طيبه يزيد
ريف ربعه اليا جت علةٍ فالنحور
احترامه مع العربان لو هو بعيد
الشاعر- مسند بن مازن الميزاني
