الشرق الأوسط صبّح السبت مفجوع
فجيعةٍ يا كبرها من فجيعة
لجلج صداها بين مرئي ومسموع
عبر الوسائل والاذاعة تذيعه
رحيل من حزّن ملايين وجموع
الشرق قبل الغرب هزه جميعه
رحيل من فرقاه سالت لها دموع
والدار تبكي والفجوع الوسيعه
تبكي على سلطان والصدمه اتروع
والحزن ما حرّم بنص الشريعه
مرحوم يا خيّر بك الخير مطبوع
في كامل الاقطار يذكر صنيعه
مرحوم يا شهمٍ بك الجود مزروع
مرحوم يا غيث الوطن يا ربيعه
أفنيت عمرك وانت للطايله طوع
مرحوم يالمقدام يوم الطليعه
رجل السياسة والوفا اقليّل النوع
مالك شبيه من النجوم الرفيعه
إلا سهيل ان اعتلى شاهر اطلوع
كف الندى والجود عندك طبيعه
يبكيك بومتعب وهو ماله اسبوع
تحت العلاج المشي ما يستطيعه
واخوانك اللي فيهم الراس مرفوع
وعيالك اللي من الحصون المنيعه
ويبكيك شعبٍ يوم فرقاك ملقوع
طفلٍ وشب وعود حتى رضيعه
لو المنايا تنطح ابخيل وافزوع
عنك نطحناها بوقفه سريعه
مار القدر من واحد لأمره اخضوع
مات الخليل ومات طه تبيعه
ويالله ياللي لك سواجيد واركوع
يا واحد امرك كل خلقك تطيعه
تجعل أبو خالد عن النار ممنوع
في جنة الفردوس وانته وديعه
الشاعر/ سالم عواد أبو جنيب العطوي - تبوك
