الورق والشخبطه واللي تشوفين

امتدادي

فكري المنثور حولي

وبعض نزفٍ من فؤادي

* * *

ذاك حرماني

وهذي آهتي وهذا مدادي

والدجى والشوق كلّه

عالمي وانتي بلادي

* * *

اعذريني لو نسيت الشاي

وآداب الضيافه

وانطلقت من القيود

اللي يسمّوها لطافه

* * *

الوحيد اللي بوضعي

عادته رفع الكلافه

نظرته دلّه ونار

ونظرتك له ارتشافه

* * *

انزعي البرقع ترى

ما لا عين غير البراقع

والبس الاحساس وادفا

طالما الميعاد صاقع

* * *

ذوّبي برد السكوت

ولّعي كل المواقع

والعني وقت الخيال

شوي.. دام الحال واقع

* * *

لملميني من على الأوراق

خليني قصيده

وارسليني مع شعاعك

للمسافات البعيده

* * *

للثلوج اللي تهوجس

باللهب ودها تعديده

للرماد اللي هجر.. جمرة وفا

ماتت شهيده

* * *

وش تخيلّتي مكاني..؟

قبل تنوين الزياره

وش تخيلتي..

سموع أو كوكب أو مناره

وش ترين بحالة اللي

عاش غربه في دياره

وش بربك غير حرق الذات

أو حرق السجاره

الشاعر: د. صالح الشادي