وطن.. جعل الولي يسعد صباحك
بالسلام، وبالأمان، وبالموده
كل عيد يمر والعزه وشاحك
من خليجك، للرياض لبحر جده
للجنوب ووين ماهبت رياحك
وللشمال وللفياض المجرهده
وانت تبسط للجميع كفوف راحك
خيرك الضافي علينا من يعده
ياعلم تحت السما رفرف جناحك
عزتك من عزة اهلك مستمده
يا وطن مكة وطيبه في بطاحك
مهبط الوحي الشريف وخير عده
ياوطن حنا شربنا من قراحك
ومن شرب من ماك عمره لك يمده
لعنبوا من داس ارضك واستباحك
لعنبوه ولعن ابو خاله وجده
مادرى ان الدين والعزة سلاحك
او لبس ثوب طلع ماهو بقده
من يكيدونك هم اعداء لنجاحك
ومن تبرا منك الله لايرده
والعدوا اللي مخطط لجتياحك
الله اللي كاد فيه وخاب سده
الجيوش التفت ولبّت صياحك
كلها من دون حدك مستعده
وقفوه بساعة الشده رماحك
والنصر مايولد الا بعد شده
ياوطن عزك ومجدك وانفتاحك
والتطور والمشاريع المعده
والتزامك بالشريعة هو فلاحك
تحت راية من نواليه ونوده
عاش من يعمل لعزك وارتياحك
ابو متعب والعضود اللي تشده
ياذرا نجد الفخر طابت جراحك
الله يحفظك وفي عمرك يمده
يا طويل العمر من ساعة مراحك
والقلوب تقول جعل الله يرده
ياقصيدي للملا بأطلق سراحك
وانت مشغل خافي من قبل مده
غنّ بأسمي للوطن يسعد صباحك
بالسلام وبالآمان وبالموده
شعر/ عطا الله ممدوح
