مرثية في صاحب السمو الملكي الأمير هذلول بن عبدالعزيز -رحمه الله-

قد لي ثلاث أيام والبال مشغول

والحزن خيم فوقنا له ليالي

خبر وفات امعزبي منه مذهول

ونبا وفاته يوم شد الرحالي

بعد أعلن الديوان ما عاد به قول

صحيح مابه شك والا احتمالي

يارب لا قوه ولا عندنا حول

وأمرك قضا وانته عزيز الجلالي

تاخذ وتعطي والامر منك مقبول

وقضاك ما يقبل نقاش وجدالي

من خافك وطاعك من الشر مكفول

واللي عصاك يذوق اشد النكالي

أكرم نُزل هذلول يا رب هذلول

وثبّت جوابه قبل يبدا السؤالي

وجعله من اذنوبه برحمتك مغسول

يالله يا ربي عليك اتكالي

وعساه من رحمتك مهوب معزول

آمين يا والي على كل والي

وعساه في عفوك ورحمتك مشمول

يا غافر ذنوب العباد الثقالي

وفي جنة الفردوس يدخل على طول

وظله بظلك وأنت راع الظلالي

وانزل على قبره من المزن هملول

واسقه من النهر القراح الزلالي

وأجبر عزا عبدالعزيز ابن هذلول

وتركي واخوه سعود واف الخصالي

في أميرنا اللي يملك اقلوب وعقول

وكريم لا عدوا كرام السبالي

شيخٍ على الطولات ضاري ومجبول

يمناه تنفق بالعطا ما تبالي

ما حط راس المال في البنك مقفول

يمناه تصرف قبل تدري الشمالي

عائض حميدان بن هميلة السبيعي