سقت المطايا فوق كف المقادير
ورجيت عفو اللي يغفر الخطايا
وردت والعربان قدهم مصادير
من مارد سوى بحالي سوايا
الخاطر اللي غربلته التّكادير
وقامت تلاعب به رياح المنايا
مسكين يااللي ماأسعفتك المحاذير
يا اللي شكيت من الجروح الخفايا
أحد بذا الدنيا حياته مشاوير
ومدبّر رزقه كريم العطايا
واحد ينام وما اتعبته المداوير
ولو كان ما يسوى تجيه الهدايا
ربا بعز وما يعرف المخاسير
أبوه وفر له جميع المزايا
وناس يشوفون العنا والتعازير
والله معوضهم بحسن النوايا
مع هل الطيران شالوا خيازير
وقلوبهم تشكي الحزن والبلايا
الله عطا الدنيا رعاة الخنازير
ولو كان تسوى ما عطاها الدنايا
وأنا اعرف المنصا بوقت المعاسير
أقدم على الطيب وأكب المعايا
وأنا أحمد الله دام أنا حي وآسير
وإن دق هوجاسي بسوق المطايا
