ياليل الحزن وش عاد باقي عقب سلطان

طوانا الرّهق والهم تبكي مواويله

وياليل الظلام اللي دموعه ملت الاوجان

وماها تحدّر لين غرّق مناديله

غشانا ظلامك وانفجر بالصدر بركان

ودمع الرحيل المرّ سالت هماليله

فقدنا السند والعزّ فيما مضى مْن ازمان

وفقدنا القراح اللي وردنا مناهيله

اشوف الفرح عقّد عقب موته الحجّان

وقفّى بعيد وباع باقي معاميله

من اللي عن عيون الوراعين والشيبان

يكفّ الدموع بكفّه وعطر منديله

ومن اللي ليا اصطكت نجي له وهو الشفقان

ويركي لحمل ٍ تتعب الناس من شيله

ومن اللي بعطفه ظلل البائس الحيران

ومن اللي يجي له كل شاكي ويشكي له

أعزّي الملك عبدالله ونايف وسلمان

واعزّي الكرم لاطفّت اكبر قناديله

واعزّي الوطن في شيخه الوافي كحيلان

وما الوم الوطن لا انهدّ من موتته حيله

اعزّي الأرامل والمساكين واليتمان

واعزّي الكفوف اللي مع الوقت تدعي له

واعزّي العرب في شيخهم سيد الاحسان

واعزّي السحاب اللي تنشّت مخاييله

اعزّي العطا في موتتك ياسخي الايمان

واعزّي الوفا لاماتت بموتك نخيله

يضيق الفضا والحزن صوته ملى الاوطان

وعاش الوطن حزنك بكامل تفاصيله

ياربي دخيلك لا تخيب رجا سلطان

وجازه عن احسانه وثقّل مكاييله

يارب ارحمه واكرمْه ياحي ياديان

وسلّمه من يوم الحساب وتهاويله

محمد بن راشد بن محمد آل حبشان