نص أنثوي طاغي العذوبة:

فمان الجرح والدمعه .. فمان الاه واللّوعات

ابرحل من متاهاتي .. وبعض اللي معي ذكرى

بلملم باقي اشلائي .. رفاة إحساس حبٍ مات

هقيتك تحفظه لكن .. قتلته ليلةٍ غدرا

عظيمة صدمتي منّك .. كبيرة خيبة الهقوات

أليمة زفرة أوجاعي .. شنيعة ساعة المسرى

ذخرتك للشقا مأمن .. لقيتك زدتني طعنات

نذرت القلب لشعورك .. وهبته جرح ما يبرى

بغيتك غيمةٍ تمطر أحاسيس الغلا للذّات

بلّلّ بالهنا روحي .. بحبك خافقي يثرى

حسافه كلّ احلامي معك صارت عليّ هفوات

حسافة قلبي المتعب .. من حمول الوجع ازرى

حضنت السهد باجفاني .. نزفتك ياعناي آهات

تحشرج عبرتي بصدري .. وأنا في لوعتي أدرى

اترجم صادق شعوري .. وصمتي خالطه ونات

كتبت الشعر بدموعي لجل ما حضرتك تقرا

أنا ذيك الفتاة اللي نحت من حزنها النحّات

تماثيل الأسى فيني ودمعي ماخذٍ مجرى

حزينة والحقيقة يا عذاب الذات فيني مات

طفل توّه على الدنيا توفى ما بعد هذرا

براءة طلّته ترسم على وجه الأمل بسمات

طفت من قبل تكتبها حكايه للزمن عذرا

تكفّن بالبياض وغمّض عيونه.. دخل بسبات

توسد مجمل أحلامه.. توفى.. ماتت البشرى

العنود بنت سعد