معنى الكلام
كل مارمت وصفك ضاق معنى الكلام
تسقط أوراق حرفي من شجر دفتري
وصار بين التشاؤم والتفاؤل خصام
المداد (المعري) والقلم (بحتري)
***
ومضة
الله على ومضة الإحساس
وشلون بين البشر تسري
احيان يفهمك (بعض) الناس
من حيث تدري.. ولا تدري
***
نبض
ازرع كفوفك بالدعا ينبت الصبح
خل الرعد والبرق نبض السحابة
الخير.. كل الخير والنور والربح
لا جت من الله دعوة مستجابة
***
حلم
حلم الشتا وش فيه ذابل ويابس
كنه تربّى في خيالات هالناس
برد الشتا تدفيه بعض الملابس
الموت في برد المشاعر والإحساس
