ياملوَعٍ قلبي من مفارقك لوع
وعندك على وصل المحبَه مناعه
تعال بسكب لك من أبياتي دموع
وأترك قصيدي في عيونك وداعه
تعال بوقد لك من ضلوعي شموع
واجلس طلبتك داخل القلب ساعه
يمكن بعد ماتشوف حبَي لك تموع
ثلوج صدَك والجفاء والقطاعه
ذبحتني محظور مرفوض ممنوع
كنّي ذنوب ولا لقيت الشفاعه
وكن الجفاء في سلمكم شي مشروع
وكنّك تفنن في جفاك ببراعه
لاتحسب إني يوم انا جيتك خضوع
الحب عزَ ورفع راس وشجاعه
لكن أخاف تقوم في يوم مفزوع
وتلقى غلاك بقلبي أعلن وداعه
في وقتها حرام ماانوي لك رجوع
ماهو تحدّي بس راي وقناعه
عمر الغلا ماكان في حبّة الكوع
مغليك مايرضيه لويت ذراعه
وعمر الغلا ماكان بالكمَ والنوع
تشوف في عين الهواوي شعاعه
ما هو تجارة بين شاري ومبيوع
وماظنتي تلقاه ضمن البضاعه
ولاهو صكوكٍ بين مالك ومنزوع
ولاهو مواقف بين شيخ وجماعه
إمّا يجي بالطيب واللّين والطوع
وإلاّ بلاش من الهوى وإلتياعه
مشاري البابطين
