اليوم للحزن في مرهف شعوري حضور

دمعٍ تَحجَّر ولكنّه تساقط شعر

إيه إيه ينبت لحزن البعض فيني شعور

وأحس بإحساسه المؤلم واذوق الأَمرّْ

كم طاح دمعة ولا مرت ببالي مرور

تشجّرت في ثرى ذاتي وصارت كدر

أوَّاه يا صاحبي ليت السعد ما يبور

إن كان يا صاحبي صدري لجرحك قبر

أكفّنه وأنحر لميلاد فرحك جزور

وأقدِّم بموت جرحك يا مشّرف زهر

تدله واحس بسعادة وانتعاش وزهور

كأنني إنت وإنت بصدق حالك يسر

يا شامخ الساس ما تصفي جميع الأمور

هذي حقيقة وهذا للبنادم قدر

عشها وهذي هي الدنيا متاع الغرور

كم طوَّلت قاصر وفيها طويلٍ قصر

زالت حضارات والذكرى بخد العصور

تسمّرت وأصبحت للمجد شاهد عصر

يا صاحبي هكذا الدنيا تدور وتجور

كم كدرت في غرايبها خواطر بشر