يا هم عمري ميت فيك برضاي
عندي ترى كن القمر من عبيدك
دلل غلاي ورد راسك لشكواي
واسهر بعيني ليلة افراح عيدك
أبي السهر للصبح لا تقضب خطاي
رحلة عيوني بين خدك وجيدك
شفتك قريب وقلت: أبا امد يمناي
واثر السما اقرب لي من مصافح إيدك
ان قلت: ماتسوا ولاشي دنياي
دونك.. فصدق يا حبيبي وأزيدك
مدري من الرايح ولا ادري من الجاي
هاجس يريد.. وهاجس مايريدك
كني قلم يكتب وهو مامعه راي
وسكبت حب أحلامنا في وريدك
راشد بن جعيثن
